سؤال مهم : لمن يملك الإجابه؟؟

[الحقيـــــــــــــــــقة]

في عندي بيت من قصيده لا أعرف البقيه من القصيده ,فمن يعرف
باقي القصيده يزودنا بها وهي قصيده مشهوره بحد علمي أن من قالها ظفيري, مناشدا جاره الحربي بعد رحيله عنه ,وأنا أريد القصيده أما القصه أعرفها.
والبيت يقول:
{الله نشد ياحمود عن معرفه يوم ــــــــــــ وحنا ثمان سنين ياحمود جيران }
أفيدونا أفادكم الله.

[عبدان]

ياليتني ياحمود ماجيت للكوم ننحر عربنا يم نجع العليان

الله نشدياحمودعن معرفة يوم وحنا ثمان سنين ياحمودجيران

ياحمود يظهرلك صديق من القوم ويظهرمن الربع الموالين عدوان



البيت الأخير .. عشناه واقعا في الانتخابات الماضية ..

[الحقيـــــــــــــــــقة]

ياليتني ياحمود ماجيت للكوم ننحر عربنا يم نجع العليان

الله نشدياحمودعن معرفة يوم وحنا ثمان سنين ياحمودجيران

ياحمود يظهرلك صديق من القوم ويظهرمن الربع الموالين عدوان



البيت الأخير .. عشناه واقعا في الانتخابات الماضية ..



الشكر الجزيل على الأفاده.............
وفي بعض الأسئله البسيطه:
من الشاعر؟
وماذا يقصد بالله نشد ياحمود عن معرفه يوم؟؟؟!!!!!
هل هي حادثه مع نبي ولا صحابي أو مع من؟؟

أما بخصوص البيت الأخير وأنه حصل بالأنتخابات الأخيره, فإني
أوافقك الرأي جدا جدا .......
وأحب أسجل لك أعترافي بأن وجهه نظرك هذه أصدق ماقرأت من كلمات كتبت تحت نك عبدان!!!!!
نتمنى لك الأستمرار بالصدق ياأخ عبدان.
ولك الشكر مره أخرى.

[عبدان]

من الشاعر؟
وماذا يقصد بالله نشد ياحمود عن معرفه يوم؟؟؟!!!!!
هل هي حادثه مع نبي ولا صحابي أو مع من؟؟


.. لا أعلم

ولكني بحثت عن تكملة البيت الذي طلبته عند العم Google ..

تستطيع البحث فيه .. لعلك تجد ضالتك ..

ولكني لا أعتقد أنك ستجد السبب .. الذي جعل من البيت الأخير يجسد حالتنا معكم .. ياربعنا !!

تحياتي لك ..

[الحقيـــــــــــــــــقة]

مشكور ياعبدان
والله يصلح شان الظفير أنشالله ويجمعهم على الحق.
ومن يستطيع الزياده على ماتفضل به الأخ عبدان فاليفيدنا
أفادكم الله

[ظفيري بلس]

ثلاث روايات

الاولى............... جاسر الحربي "مروية عن راوية شمّري من شريط"

مفضي بن ولمان الاحمدي, قتل واحد من ربعه وجلا عنهم واستقربه المقام في قبيلة شمر عند شيخ العليان والفارس (بن سعيد)( معشى الذيب)...........
بس مفضي عرفهم بنفسه باسم ثاني وهو (رويعي الحربي), المهم مفضي جلس عند هالشيخ الكريم واذا ما جا بن سعيد الا وقام مفضي (رويعي) وقلط على الدلال وصلح القهوه لعمه بن سعيد .........

المهم في يوم من ذيك الايام, أغار قوم على ابل بن سعيد وماكان في هالوقت الا ثلاثه رويعي( مفضي الاحمدي), و(بنت ابن سعيد), وخيال بسيفه كان حول الحمى ...............

ويوم ان الابل انوخذت قام رويعي يسعى لراعي الحصان وينخاه ...... المهم راعي الفرس قال وهو ميت من الضحك: كيف تبغاني أحارب القوم وانا شخص واحد ؟؟ !!

قال له رويعي( مفضي الاحمدي): انت ماش هات الحصان والسيف ...... قال هاك الحصان والسيف وهو يضحك بعد وقاله:هذا الحصان والسيف ولا تضربهم الا مع رؤسهم ...... يستهزيء الاخ

ركب رويعي الحصان ولحق بالقوم وقتل منهم أربعه ورد النوق وجاب خيلهم قلائع( غنيمة ودليل), وفي ذاك الوقت وهو يحارب القوم ويطاردهم كان يعتزي بقوله: خيل (فلانه) أحمـــدي
سمعته بنت سعيد وعرفت انه هذا ماهو رويعي الا هو فارس شجاع واختفى تحت هالاسم (رويعي).

المهم يوم عاد مفضي بالخيل زهم على راعي الحصان وقال له: دوك حصانك وسيفك وشف هذي أعنة الخيل القلائع ولا أحد يدري اني انا اللي رديت الابل وجبت هالقلائع ........ وطبعا وافق !!!

وفي الليل صار رجال القبيله يتوافدون على بن سعيد يباركون له رد الابل. ومثل العادة قام رويعي وشب النار بيصلح القهوه. ويوم قام يبي يصب الدله الا وبنت ابن سعيد تخاطب ابوها بقولها:
قالت: يا يبه ابغا منك طلب وان شاء الله ما بتبخل عليّة......... قال ابوها:وش هو يا بنتي ( كان يعزها كثير)
قالت:اللي يبغا يا يبه يعطي ما ينشد طالبه !! .......... قالها: جاك طلبك يا بنتي ....... قالت: ابغا اصب القهوه بدل رويعي ......... قال ابوها: صبيها ما فيه غير رجالك وعيال عمّك...........

بنت سعيد صبت اول فنجال لبوها وثاني فنجال صبته لــ رويعي( مفضي الاحمدي) ..........
بنت سعيد أعجبت بــ رويعي وبشجاعته .......... من شان كذا حبت تعرّف ابوها باللي صار ........ وقالت:
يا يبه ترى اللي رد الابل ماهو فلان راعي الحصان .. هذا رويعي وهو متخفي تحت هالاسم وتراه من الاحامده من حرب وما ظنتي انه راعي الا هو فارس وعزيز.............

قال ابن سعيد: يا رويعي وش سالفتك. وبما ان مفضي الاحمدي(رويعي) عرف منهو عمه من الرجال وانه راعي وفا وكرم استأمنه واعطاه سالفته مع جماعته ........ قال ابن سعيد: يا مفضي انت عنهم أبعد من النجوم وترانا مسيرين على جماعتك بنسوي امرك معاهم ........

وفعلا الفوا على الاحامده وقال ابن سعيدك هذا مفضي صار واحد منا كان تبغون السوق فحنا ما جينا الا متكفلين فيه .......... وافق الاحامده بالسوق ......... ودفع ابن سعيد وربعه الديه كامله عن مفضي ...

ورجعوا العليان واميرهم ابن سعيد لديارهم ومفضي معاهم .......... ليش؟؟
كان الرجال قد وقع في حب بنت سعيد (اللي عرفت بزين اخلاقها وحسن منطوقها وعقلة راجحه). طلبها من ابوها ووافق .............

بنت ابن سعيد كذ عشقت (رويعي) وهو تحسبة راعي يوم شافة فعايله ( شفتوا وش اللي كان يعجب بنات الرجال اول +++++++++++ الشجاعه مو مثل هالوقت ===== ماااااااالت)
المهم قالت بعد اللي صار:

تستاهل الفنجال ومواسد الراس= يا معتزي بالعزوة الأحمدية
يا كاسب الطولات في كل نوماس= اطلبك لا تبخل بروح العطيّة

رد عليها مفضي بقوله:

يابو خد أبيض كما لون قرطاس= فكيتها من شان حقك عليّة
روحك علي راضه وروحي علي باس=مطلوب ثار من وجيه الرضية

وعاش مفضي الاحمدي عند شمر وجاب من بنت سعيد ولد حمـــود ..... وله قصة أخرى كذلك مع جماعته وابن سعيد مشهورة


ــــــــــــــــــــــــــــــــــــــــــــــــــ ـــــــــــــــــــــــــ

اما الثانيه

الرواية الثانية........... طلال الحربي
مفضي بن ولمان الاحمدي, واحد من جماعته وجلا عن ديار حرب من المدينة المنورة .. واسقر به المقام في قبيلة شمر وتحديداً عند شيخ اشتهر بالكرم وهوشيخ العليان من شمر / بن سعيد "" معشى الذيب "" ...........
جاهم ( مفضي الأحمدي) تحت اسم " مستعار " وهو (رويعي ), المهم قاله ( معشي الذيب ) وش عندك قال : جاي ادور مرازق الله .وادور الرعيه . ..وهاك الوقت مصادر الرزق محدوده ومافيه الاالرعيه اوماشابه ذلك .
جلس عندهم واتضح لهم انه انسان محترم بكل معاني الكلمة . وقضبوه احدى الرعايا وضلا يسرح فيها . واذا جاء يقضب الدلال لين يسرون للنوم . اخذ عندهم سنين وفي يوم من الأيام وهو كان مستفلي بالبل وبجنبه بنت ابن سعيد معها رعيه , ولادروا الا انقضت عليهم مغيره وهم يأخذون الرعيتين رعيت " ارويعي " ورعية البنت.
وليا.. جيت واحد على خيله من جماعة البنت وينطحه " رويعي" : الحق القوم اخذوا الحلال وانت رجال مسلح وعلى خيل - قال والله مالي فيهم قدره هذولا قوم تبيني انطح قوم الحالي - قاله " ارويعي" - اجل تكفى عطني الخيل والسيف . كن الرجال استهان بـ " رويعي " - نزل عن الخيل وعطاه السيف وقال الله الله لا تضربهم الا مع رؤسهم ...... ركب " رويعي " على الخيل ولحق القوم وقتل منهم اربعة ورد الحلال , ورد الخيل الصاحبه .( البنت شاهدهت وسمعت كل ماجرى .. " كانت متخفيه خلف صخرة" ) ويوم انهم روحوا يم العرب وعلى عادته الاحمدي . يجلس يزين القهوة . والبنت اتراقبه من بعيد .. والناس في بالهم ان اللي رد الحلال " الرجّال اللي معه الخيل" ويوم شافت البنت ان القهوة والمه وهي اتنادي على ابوها - يايبه - قال: نعم -قالت : طلبتك - قال: وش تبين -قالت : اللي يبايعطي مايقول وش تبي .اما قول تم ولاقول بدى . قال : لابالله الا تم .. قالت : ابصب القهوة الي زين " ارويعي " قال : ماعندنا غير بنيـ خيك وعيال عمك ... تعدي صبي القهوة -- وهي اتعدى وتاخذ الدله وتقوم "رويعي" من يده . وهي تقعدة على الشداد الي مرتكي عليه ابوها وصبي اول فنجال لبوها وثاني فنجال " لرويعي " وهي تقول : يايبه ترى هذا الرجال الي رد الحلال ... وعلمت بكل اللي صار ... وقالت ان شفاك ضني ان ماسمه "رويعي" وانه رجّال ماهو بسيط وان وراه قصة --- المهم-علمهم "رويعي" بأسمه الحقيقي الي هو ( مفضي بن ولمان الاحمدي الحربي) وباسباب مجيه انه رجال مطلوب عليه "ارقبه" وطلابته من جماعتة من الاحامده من حرب - المهم - روحو لهم شمر مناديب وقالوا لهم الرقبه الي في بطنه حنا المسوؤلين عنها اطلبو اللي تبون .. قليل اوكثير
واما الرجّال عندنا والله انه ابعد من مطلع الشمس على مغيبها -- قالوا - لاوالله حنا مير ماندري عنه من اول هو حي او ميت مير يوم الله اعقله " نبي الديه " المهم ادفعوا شمر الديه المطلوبه . .....
وطلب الاحمدي البنت من ابوها وجوزه . وجلس عند نسايبه من شمر (18 عام )... ورزقه الله منها بذريه .. واكبر اعياله اسمه حمود . وفي حدا المرات يلعب "حمود "مع عيال خواله " عتمه با الليل .. وضرب حمود واحد من عيال خاله .. وقاله: ولد خاله كلمه(......) ماعمره سمعها حمود .. وراح يم ابوه وقال: يايبه ولد خالي ضربته وقال لي : (.....) قال ابوه اطلعت منهم ( اجدعي البيت يامرة) يوم اصبح الصبح . ويجونه جيرانه ونسايبه .. وش العلم .. قال والله ابد ودي عيالي يعرفون اعمامهم وبنيخيهم .. وانتم ماقصرتم معنا وقضينا عندكم مده ماننساها _ هذا عذره قدامهم _ وقال من قصيدة له وهو ماشي :

ياحمود عن ديرت خوالك جلينا ****** سود الوهـم من يـمنا تـلطخ الـجال

ليا صار قـربك مايحـشم عـلينا ****** ان طعت شوري دنو الزمل بالحال

وصل للحناكيه عند جماعتة الحروب وخذ مايقارب الشهرين وختلف مع ناس منهم .. _وطق جوله _ يبي يرجع الـ نسايبه من شمر وقال هذه القصيدة الرائعة :

لاواهني ياحمود من فارق الدوم

**************** نـبي عــربـنا ... يـم اطـاريـف رمـان

ياحمـود والله ماعـليـنا بها لـوم

**************** ماستانـس الـى وسـط نـزل العلـيان

ياحمود كني عندهم باشت الروم

**************** ومـزودن وزنـي عـلى كـل مـيـزان

الله نـشد ياحمود عن معرفة يوم

**************** وعشر وثمان اسنين ياحمود جيران

ياحمود يظهر لك صديق"ن" من القوم

**************** ويظهر من الربـع الموالـيـن عــدوان

وعاد الي شمر وجلس عندهم الي ان توفي رحمه الله وجميع اموات المسلمين .. ..
وبقيت ذريته في حائل الي وقتنا الحالي " وتلعة الاحمدي معروفه في حائل " ومشتهره بالنخيل


ــــــــــــــــــــــــــــــــــــــــــــــــــ ـــــــــــ

اما الثالثه


الرواية الثالثة......... من الرااااائع (الاحمــــدي)

====================================

الرواية الثالثه........ الاحمدي " الراااائع" ........


تعليقي كان على القصه هم رواه الذين استسقيت منهم هذه المعلومه هم كبار في السن
واني احفظها منذو الصغر وجميع الاحامده في جده والمدينه وفي الديره يتفقون على هذ الكلام وان اختلفو فالاختلاف بسيط لا يغير في القصه شيء مهم ولا يوثر على تركيبة الاحداث

احبتي هذه القصص والوقائع التاريخيه تختلف من منطقه الى اخرى حسب رواة الاشخاص لانه في ذالك الحين لم تكن موجوده اوراق واقلام تترخ وتسجل في حينه
ولكنها اتناقل من مجلس الى مجلس فيتم ازيده فيها والنقص

حتى لاطيل عليكم هذه القصه وانا بكل صدر رحب اقبل تعليقاتكم وارا ئكم وانا سعيد بذالك
ويعلم الله اني احبكم في الله

******************


على حسب ماسمعته من شيابنا وارواه عندنا في طاشا وهنا في مدينة جده من ناس ثقاه
واتفاقهم في النص والاحداث هو انه هذ ابو رويشد احمدي ويقال انه من النواحله من منطقة كحله وكحيله بالقصيم والله اعلم ابوه قتل والذي قتله شرد الى قبيله يم نجد فذهب يقتفى اثره وغير ملابسه
واصبح يلبس ملابس باليه وممزقه وكانه دريويش
يلم من القماش المتقطع وشايل معاه جراب في ملح ورصاص متقلدها ويلم حوايجه مع الجراب وقام يوحي من الملابس المجمعه ويمشي درويش ولا وصل عند العرب يسوي نفسه دريويش واذ خلا لوحده قعد يقصد ويتوجد
عند الناس ينصى عند الرحاء وحياناً يروح وسط الغنم ويطلب حليب من نساء الفريق
يحاولون معاه رجال القبيله ويطلبون منه انه يجي في مجالس الرجال ويرفض طلبهم ودعوتهم حتى لا ينفضح امره ويصر على ان يترمى من ساحة فريق الى ساحة فريق
واشتهر ذكره بي الدرويش الدرويش وبقي 6 سنوات في نجد على هذه الحال وبعد 6 سنوات وفي ذالك اليوم قال له الشيخ انته بدل مااترمى كذ اسرح مع البنت راعية الزمل (الابل) وتسقيك حليب معها فوافق الدريوش( ابو رويشد ) وسرح مع الراعية
وراعية البل بنت الشيخ لها عاشق ولد مزيون من القبيله حاط نفسه فارس معاشقها يمشي معها وين ماسرحت بالابل (الزمل) ولا امرحو يشربون لبن من الابل صبو في الربعه (اناء من الخشب يسمى الربعه مصنوع من البشامه او القفل او السدر) واسقت عشيقها في هذ الاناء وتقول لدرويش ( ابو رويشد ) صك يدك ويضع يديه(كفيه) جنب بعض ويشرب .
في احد الايام في الصباح جالسين تحت شجرة سرحه حتى غارا عليهم قوم
المزيون هذ عشيق البنت ركب الفرس قال ابغى افزع للعرب البنت قامت تسترجيه تكفى يفلان ابوك افلان وخالك افلان تكفى يالاجودي فيقول لها ابغى افزع للعرب مني قدره عليهم ولما ترجل على الفرس وبدا ينحرف يبغى يشرد يقوم درويش يفك الجراب حقه
ويسكب الملح والرصاص على اعمامته ويلقط الجبه الى معه وفي ذالك الزمان ما كان يوجد بارود في نجد غير السيف ويملئى البدق بالبارود والرصاص ويثور لا تثور بندقه الى في فرس ولا فارس ولاتثور الثانيه الافي فرس وفارس وهو رجال بواردي معروف ولكن العشيره الى هو فيها مايعرفونه
والقوم الذي غزا متهولين من هذ الرجل الذي يديه زي الملاقيط على البندق
وكان يستعزي مقولته المشهوره
(خذها من كفي وانا ابو حمد العين مسقيتني في يدي تسقيك يالمزيزن في ربعتها)
فهمت البنت العزيوه (الحدء)
القوم انهزمو انذبح الى انذبح ونهزم الى انهزم وانفكت الابل من القوم الغازي ولما تطمن انهم ارحلو قال للبنت تكفين يابنت الاجواد لا تعلمين قولي فكها هذ الى شرد
فقالت له طيب ابشر ولم اجرابه وزهابه الى فيه الرصاص والملح زي مكان قبل الغزو
ويقال انه كان في ذالك الزمان انه البنت يسمح لها انه تدور بالقهوه في مجلس الرجال
وخصوصاً اذ كانت بنت شيخ القبيله .
فطلبت من ابوها انه يجمع جميع رجال القبيله في مجلسه وانه تصب القهوه فوافق ابوها الشيخ وجمعهم في الديوان الخاص به
نظرت من خلال الواسط ولم ترى الدرويش قالت ابويه الدرويش وينه فقال لها مالك ومال الدرويش فقالت تكفى ياابوي ارسله انه يحضر معكم فسمع ابوها الكلا وارسل في طلبه وجلس عند الردامه حق البيت
فقامت البنت فصبت فنجال القهوه ومرت من وسط المجلس والعيون تراقبها حتى وصلت عند الدرويش فقالت

جاك الهوىمني اعشاقه من الراس
……………ان كان ماتبخل بروحك عليه
يا ملحق الدخان يامروي الكاس
…………….يا معتزي بالعزوه الاحمديه

فرفع راسه ونظر فيها وقال

مالي هوى يابو نهيد كما الماس
………….مالي هو لوسمت روحك عليه
روحك على راضه وروحي على باس
…………….طلاب عاني لربوع الوفيه

فقال ابوها خذ الفنجال وعطاك الله سنه تراها مرتك فاخذ الفنجال وهي اطرحت الدله ورجعت ودخلت مقصر البيت وبعد ذالك انفض المجلس
فانكشف امره فعرفه القوم فرحل الى القبيله المجاوره لهم الذي فيها القاتل
وكان له رحيم (المقصود رحيم واحد من جماعته )موجود في هذ القبيله فنصاه في الليل حتى لا يوصل خبره للقوم (قصته مع الغزو وخصوصاً بيت الشعر الذي قال فيه طلاب عاني لربوع الوفيه )
وسألهم عن حالهم فقال الرجاجيل في النهار يتزاربون و في الليل في المحل الفلاني حطين لهم مراح من الشجر داير مايدور وسدادته كتاده (نوع من الشجر يشبه العرعر ) المقصود القاتل وجماعته الخمسه في النسب (العصابه ماسكين الجنبيه الذين لو قتل احدهم يعتبر كانه قتل القاتل ) وليس رجال القبيله كلهم
رابطين فيها حبل واحدهم حاطها تحت راسه لانهم متوقعين انه يجي في اي لحظه لاخذ بثار ابيه . فقال له خير انشاء الله.
فذهب ونام حتى اخر الليل واطمأن انهم نامو فقام ووصل عند السداده فقطع الحبل وسحبها بدون ان يشعرو به (لان غريمه نائم معهم ) فدخل ونام معهم بجانب خصمه
ذباح ابوه فيضع راسه عند راسه فوضع الفرد (نوع من البنادق صغيرة الحجم ) فوضع الفرد على قلبه ويثورها فلما سمعو تثوير البندق ضل هو نائم تحت الفراش ولم يتحرك فقامت الناس تحسب الفاعل من الخارج فخرجو من السده بسرعه ولم ينتبهو ان الفاعل نائم وسطهم فلم اطمئن انه لااحد بجنبه خرج واتجه الى رحيمه
فقال له والله ان رميت لي رميه والله مادري عنه صابت ولا اخطأت فقال له رحيمه
الصبح واخير .
في الصباح ارسل بنته فقال لها روحي لفلان وهو صاحب له قولي له يقول لك ابويه ماشفت جمله لاشعل فذهبت البنت لرجل الى وصاه ابوها اليه فقال لها الا قولي له هو اياه هو اياه فرجعت البنت واخبرت ابوه فاخبر ابو رويشد (الدرويش ) فخرج من عند القوم فوصل العنيق في اعلى الاب و ارحقان وعند وصوله محليه (منطقه بين الفقره ووادي طاشا تبدي على الصديره شاف له شنير (نوع من الطيور يشبه السمان ) ثور بندقه عليها فسمعه الامير (الشيخ) ابن مطلق فقال يعيال اذبحو ذبيحه ابو رويشد هذ ه بندقه ثارات في راس محيليه
فقالو بسم الله الرحمن الرحيم انته اتحلم وينك وين ابو رويشد فقال ابن مطلق اقولكم اذبحو ذبيحته
فعلاً قامو واذبحو ذبيحته وركبوها على النار فقالو جاء جاء وان ماجاء ناكلها حنا يوم اخلصت الاهذ ابو رويشد داخل عليهم حيو فيه وحطو صحن الذبيحه وقال الشيخ حياك الله على اقراك
قال ابورويشد حياني الله على الفان هذ ماهو اقراي فقال الشيخ اذا البندق الى ثارت في راس محليه ماهي بندقك هذ ماهو قراك فقال حسبك الله يالشيخ والله ثارات وهذ صيدتها ويقوم يخرج الشنير من اجرابه
فقامو تغدو فحلقو راسه كنايه بانه اخذ الثار ويجلس عندهم كم يوم ويرجع ابو رويشد الى نجد ويتزوج البنت ويعيش معهم فتره من الزمن وثم رجع يم جماعته

************

[الحقيـــــــــــــــــقة]

يعطيك العافيه ظفــ بلس ـيري
وأنا عاجز عن الشكر على مابذلت من مجهود
شكرا شكرا